Lettera al Sindaco, di Cristina Marson
Caro sindaco, co póche paròle e do tre rime,
vojo farte capìr quél che me deprìme,
so venesiàna e amo sta laguna,
che de Venèssia xe la so cuna …
Volémo parlàr dei so abìtanti ?
che i xe scampài via tuti quanti?
O de le case in afìto ai stranièri ,
o dei negòsi in man ai forèstieri ?
Se podària parlàr dei luchéti sui ponti,
i ciapa miliardi basta far do cónti !
In riva de San Marco, i vende le borse,
co pàsa el vìgie, ti vedi che corse !
I spinze la xénte par scampar via,
pò i ciàpa na cale, e i ritòrna par màgia …
De le navi no parlo par carità,
che solo a pensarghe me go agità ,
e i vaporéti, incubo dei residenti,
che par montàr i te spaca i denti …
e dei nizioleti orgòglio Venèssian,
dèso i xe scriti anca mezi in itàlian ?
Palàsi vendùi pieni de memoria,
che de Venèssia i fa la stòria …
Spèta ciò, no go finìo sa,
altre do ròbete go da dirte qua,
no me piase miga che sui muri se scriva,
che sia un monumento o anca su riva,
fa tanto bruto veder sti scarabòci,
me piànze el cuòr e me vien e lagréme ai oci …
De Venèssia ormai tuti i se fa paróni,
ma la xe in man tua caro sìndaco Orsoni,
ti ga da difènder sti ultimi venèssiani,
gavérmo el dirìto de vìver da cristiàni,
fala risplénder, e rìdarghe a sta cità,
tuta la fòrsa e la so dignità,
par le strade voèmo sentìr nei ani
parlàr el dialèto dei veri venèssiani,
no sta invelenàrte se i te fa le vignète,
o i schersa co ti ne le barzelète,
vol dir che alóra calcòsa no va …
che quél che ti ga fato xe sta sbaglia’,
vojo sperar, che in un cantón del to cuòr
ti gàbi àncora un fià de amór …
do ultime paròle me vien fòra sta bóca,
“Venèssia xe na pèrla, se varda e no se tòca !”
Cristina Marson
29 maggio 2014
Gruppo 25 aprile 